«Буряад-Монгол ном» хэблэлэй хүүгэдтэ зорюулан гаргаһан «Эдир зурааша» гэһэн шэнэ номой онсо талань гэбэл, энэ номые гансашье уншаха бэшэ, тэрэнэй хуудаhанууд дээгүүр зуража болохо. Тиимэһээ номуудай хуудаһа эреэлхэ дуратай эдир нүхэднай энэ ном соо юушье зураха, шэрдэхэ аргатай.
Хажуугаарнь номдо ороһон таабаринуудые таажа, шүлэгүүдые уншажа болохо. Ном зохёогшо – буряад хэлэ, бэшэгэй багша, залуушуулай болон хүүгэдэй дунда дэлгэрһэн олохон дуунай үгэнүүдые зохёогшо Нина Лёнхобоева-Артугаева.
Мүнөө үеын хүүгэдтэ яаха аргагүй тааруулан Номой зурагуудые бүтээгшэ Гурожап Жалцанов. Энэ ном залуу зураашын түрүүшын ном болоно. «Би жаа байхадаа, эжы абынгаа намда абажа үгэһэн номууд дээрэ, зуража болохогүй гэhээр лэ байтарнь, зуражал байдаг һэнби. Мүнөө зураһан зурагууд дээрэмни, үхибүүд, бодомжолжо үзэхэдэтнай болохо – зарим зурагуудыень таабаридал адляар тааха хэрэгтэй. Дутаһан зурагуудыень өөһэдөө зурахадатнай болохо» – гээд залуу зурааша хүүгэдтэ хандана.
«Арюун сагаан сэдьхэлһээ юумэн бүхэндэ хандажа, оршон тойроноо сэлмэг будагуудаар харуулжа, ажабайдалайнгаа уран зурааша болыш даа» – гээд уншаха дуратай хүүгэдтэ энэ номые зохёогшо Нина Артугаева хандаба.
